Monday, March 26, 2007

!!نكســة مــارس 2007



!!عارفين طبعا نكسة يونيو 67.... أهو النهاردة زي يوم النكسة دا تمام
النهاردة الاثنين 26 مارس يوم الاستفتاء على المهزلة الكبرى اللي اسمها
"تعديل الدستور"

الواحد فعلا مش لاقي كلام يقوله لأن المهزلة دي اكبر من اي كلام
انا مش مصدقة إلى الآن ان الدستور دا كدا خلاص هيتمرر بالمنظر دا
!!ربنا يرحمك يا بلدي ..كنتي طيبة وبنت حلال

ادينا اهو مستنيين النتيجة "المعروفة مسبقا" وعليه العوض ومنه العوض


Tuesday, March 20, 2007

إلى كليتي الموقرة







أول حاجة أحب احكي لكم عليها كليتي ..


أصلا أنا كنت جايبة مجموع عالي جدا فوق ال99ونص لكن
انا كبرت دماغي من طب ومافكرتش فيها خاااالص

رغم الحاح الجميع عليا اني ادخلها ، بس كل واحد عارف نفسه
احسن من اي حد وبجد أنا كنت متأكدة إني مش هعرف أمشي في طب خالص ..
!!وانا اصلا مش بحب الأحياء
المهم ثاني كلية على القائمة كانت صيدلة .. انا اصلا بحب الكيمياء جدااااااااا
ودخلتها على هذا الاساس لكن اكتشفت انها كلاكيع وحاجة كدا مالهاش
اول من الاخر وإن الكيمياء دي مادة كدا بياخدوها على الماشي لا اكثر ولا اقل
انا بصراحة كان في دماغي إن ادخل كلية أدبية من الاول زي آداب قسم
.لغة عربية أو قسم اعلام لكن قدر ربنا سبحانه وتعالى بقى الحمد لله.

نرجع لكلية الصيدلة .. طبعا طلعت النتيجة زي ما انتوا عارفين مابقالهاش
اسبوع اهي وعلى إثرها .. كتبت هذه الرسائل القصيرة السريعة
: لكل قسم عندنا في الكلية
إلى قسم العقاقير... أخبار نتيجة ثانية وثالثة ايه؟؟!! (وحشة مش كدا!)*
آدي آخرة تطوير الجودة (ماطمرش) ارحمونا
إلى قسم الصيدلانيات ... كفاية حشو في المناهج بقى .. أنا بعمل رجيم!!؟*

!إلى قسم الكيمياء العضوية... ألفين سلام وتحية ..لقسم الرعب في الكلية*

إلى قسم الكيمياء التحليلية... أبص فوق اشوفك أبص تحت أشوفك .. أبص يمين*
شمال .. أشوفك ..ممكن توسع شوية ؟؟
!إلى قسم الكيمياء الصيدلية الطبية ...كمال وجمال وأدب وأخلاق......(ماحدش عنده عريس)؟؟*

!إلى قسم الفارماكولوجي... بيقولوا الدم بيحن ..إمتى تحن لأصلك ونلاقيك قسم عندنا في الكلية ؟؟*

!إلى قسم المايكروبيولوجي.... عندك اكتئاب وعايز تتخلص من حياتك بسرعة؟*
خد قرصين مايكرو على الصبح
!!وماتنساش تدعيلى

وأخيييييرا..... إلى كل دكتور ودكتورة تشرفت بتدريسهم ليا ..
!!!!والله العظيم بحبــــــــــــــــكم


تمت :)


Sunday, March 18, 2007

...علشان تعرفوني

بيقولوا علشان تعرف الانسان اللي قدامك لازم تستني لما يتكلم
وأنا هنا هتكلم إن شاء الله ومنتظرة مشاركتكم الكريمة معايا
أما عن اختياري لعنوان المدونة "ظل قلم"..فأنا مؤمنة بأن القلم
والورقة هما خير صديق وخير من يعبر عن الذات ..ولذلك
فأفكاري في ظل هذا القلم ...هنـــــا
:)