Tuesday, May 29, 2007

!!أنا .. بين حر الصيف .. ونار الامتحانات.. وعذاب المايكرو


!!مين فينا مش بيعز الامتحانات؟ ولا بقى حرررر االصيف؟
دول معزتهم غالية اوي
!أنا مش عارفة إيه العلاقة الحميمة اللي بين الصيف والامتحانات
!يمكن لأن كلاهما بيكون "مولع" نار
!والواحد وهوا بيذاكر مابيبقاش عارف هوا ايه سبب سيحان دماغه

...الحر ولا المواد اللطيفة اللي بيذاكرها

المهم أنا بذاكر مادة رخمة كدا اسمها "مايكروبيولوجي" .. دي لو قعدت
أوصفي في مدى غلاستها مش هخلص .. عارفين السهل الممتنع؟
شوية احس انها سهلة جدا جدا ، ولما أحفظ ألاقي كله طااااار

المايكروبيولوجي دي خليط مقزز من باكتيريا وفيروسات وشوية فطريات
شوية أسماء كدا ملهاش اول من آخر + على شوية أمراض +
وكل مرض ومرض بجد الله يعافينا .. شايفين الصورة الأمورة اللي فوق
!اللي لونها أخضر في أسود دي .. دي باكتيريا بتعمل مرض الطاعون
..!أما اللي فوقيها دي .. دي منظر باكتيريا الجمرة الخبيثة

شوفتوا المأساة اللي بذاكرها .. وكل يوم وشي في وش الكتاب دا
يمكن الميزة الوحيدة اللي باخدها من المايكروبيولوجي إن الواحد طول
ماهوا قاعد بيحمد ربنا سبحانه وتعالى على نعمة الصحة بجد
الحمد الله اللي عافانا وأتم علينا ستره ونعمته
!مش هطول عليكم أكثر من كدا وهقوم أذاكر مايكرو

!امتحـــان عن امتحــان يفرق

عايزة اقولكم على حاجة كدا، في البداية كنت مترددة جدا بشأن المدونة أعملها ولا لأ
وبعدين اكتب ولا لأ... لكن بمرور الوقت حسيت ان كان لازم اعملها من زمان
!! الظاهر إن التدوين دا بقى ادمــــــــــان

بإختصار كدا المدونة وحشتني ، لولا الامتحانات عليها ألف "لعنة" !! بجد الامتحانات دي
فعلا غُلب وقرف وبلاء للطلبة في الدنيا دي ..
علشان كدا كنت عايزة أذكركم ونفسي طبعا ..إن الامتحانات دي لازم تذكرنا بإمتحان الآخرة

أهو دلوقتي اللي مش بيذاكر طول السنة بدأ يذاكر، واللي مش على باله من أول الترم فاق لنفسه
لكن خذوا بالكم إن دا امتحان محدد بوقت ، ومعروفة بدايته امتى ونهايته كمان امتى....! أما امتحان
الآخرة ..فالله أعلم كل واحد أجله امتى ..وساعتها هيبدأ يتحاسب وهتقوم قيامته وهيكون قبره إما روضة
من رياض الجنة أو حفرة من حفر النار

فحقيقي لازم واحنا بنذاكر ماتغيبش عن بالنا الحقيقة المهمة دي ، أيوة الامتحانات مَرار لكن نبتغي بيها
وجه الله سبحانه وتعالى علشان ناخد ثواب عليها .. لأننا كدا كدا مبليين بيها !! ونفتكر كمان اننا نكون
دائما على استعداد لإمتحان الآخرة .. لأن الدنيا دي محطة وورقة امتحان فاضية الشاطر اللي يمليها كلها
!حسنات ... ويبقى كدا حل الامتحان صح

ربنا يعدينا من كله على خير،،،



Wednesday, May 16, 2007

!!ما أروع أن تناجي الله




كنت قولت في التدوينة اللي قبل دي إن انا مخنوقة جدا ومتضايقة
قعدت مع نفسي شوية وقولت إن الواحد لما بيبلغ به الضيق مبلغة لازم بيكون لسبب جواه
أيوة .. امال انتوا فاكرين ايه؟!! إن المشاكل بتتحدف علينا وخلاص ..
الواحد بيبقى محتاج إنه يفوق من حاجة معينة أكيد ولذلك ربنا سبحانه
وتعالى بيرسل له اشارات .. ممكن تكون محن او ابتلاءات خفيفة
لكن لما نفكر في سببها كويس .. هنلاقي ان ربنا سبحانه وتعالى نفسه
يسمع صوت عبده في الدعاء والالحاح فعلا بجد لو كل واحد وقف
في موقف كان صعب عليه جدا وحاول يتذكر قبل ما يتعرض للموقف دا
كان واقف فين من علاقته بربنا سبحانه وتعالى هيلاقي نفسه كان بعيد
شوية ... طبعا الكلام اللي بقوله مش شرط ينطبق علينا كلنا لأن
ممكن ناس تتعرض للابتلاءات وهي اقرب
ماتكون لله عزوجل ودا بيكون لرفع الدرجات إن شاء الله

خلاصة اللي انا عايزة اقوله .. هو إن جالك هم ماتقولش انا عندي هم كبير
ولكن قول يا هم انا عندي رب كبير
توجه لله سبحانه وتعالى بالدعاء وارفع ايدك وناجي ربنا سبحانه وتعالى
وكلمه واشكيله همك .. لأنه ماحدش هيسمعك قد ما ربنا سبحانه وتعالى
هيسمعك ... ادعي وادعي وناجي ربنا وألح في الدعاء وخصوصا في وقت
السحر .. اللي هوا من بعد 3 بالليل .. ربنا سبحانه وتعالى بيتنزل في
الثلث الأخير من الليل في السماء الدنيا ...لو عملت كدا فعلا هتلاقي
مفعول السحر .. هتحس انك الصبح اتولدت انسان جديد ..
هتحس بطهارة ونقاء وجمال جواك .. هتحس انك ملكت الدنيا جميعها
وانك وقعت على سر وعلى كنز من الكنوز .. خليك دائما قريب من ربنا سبحانه
وتعالى ..علشان ربنا سبحانه وتعالى يكون قريب منك...
جربوا الوصفة دي وبجد هتدعولي إن شاء الله
احب اختم كلماتي بأنشودة جميلة جدا .. اسمها أحــــبك ربــي .. لأبي عبد الملك


Tuesday, May 1, 2007

"دَمـــْــــعةُ ..عُـــــمْر"

!!نظرا لمروري بحالة نفسية غير مستقرة
فإنني أصبح بحاجة شديدة للكتابة
!ونظرا لأن هذه الحالة النفسية غير مستقرة بالمرة
!!فإنني غير قادرة على الكتابة مع انني بحاجة إليها
لكن بينما انا اقلب في اوراقي ومذكراتي وجدت هذه الكلمات
أترككم معها إلى أن اعاود الكتابة
..
هي دمعة
..سقطت من عينيها
..تتجرع كأس الجحود
تهتف بآسرها
..من وراء أسوار.. وقيود
..تتمنى لو يعود
***********
تتمنى لو يتذكر لحظة
..أن هناك قلبا ينتظر
..يتحرق شوقاً ليراه
!لكن
..تدحرجت على أرض الواقع
.إنه لن يعود
***********
..هي دمعة
..سقطت تغسل هموما وراء القلب
..تتوسد فجراً
وصباحا لن يعود
***********
..هي دمعة
تتأرجح بين أنقاض الخريف
..ومرارة النهاية
سقطت من عينيها
.لتشتعل بلا وقود
..
..
..