العيد ... فاااارما

كل سنة وانتم طيبين .. طبعا هتقولوا مالها دي

بعيد عليكم بعد الهنا بسنة .. بس ماكنش ليا نفس ادخل

نت اليومين اللي فاتوا ..

علشان نفسي مسدودة من كتر اكل الفتة

:D :D

بجد بقى عندي مادة كدا قارفاني في عشتي ..

فارماكولوجي ... أو علم الأدوية للي مش عارف

المهم يعني امتحاني يوم الثلاثاء وسبحان الله

اقعد اذاكر اذاكر ومافيش فايدة حاسة ان انا مش مستوعبة

انا حابة المادة جدا مع انها مستفزة .. لكن مش عارفة

ليه حاسة ان انا مش قادرة اذاكر

ربنا يكرم..

ادعولي بالله عليكم ربنا يشرح صدري وييسر لي امري

وكل الناس بتقول .. العيد فرحة ..

!وانا بقول .. العيد فارما

اسيبكم مع شوية امثلة صيدلية ألفتها على غرار

الامثلة المصرية المتداولة

:)

اقلب الصيدلانيات على فمها، تطلع الصيدلة الصناعية زيها

الباب اللي يجيلك منه الامتحان ، سده بغرا ودهان

ياداخل بين الفايتو والعقاقير، ما ينوبك الا الاكتئاب وتأنيب الضمير

!!وكفاية كدا النهاردة

!! تاااااج عشرتلاف

وصلني التاج الجميل دا من اختي الحبيبة صاحبة مدونة صمود

والحقيقة التاج جميل فعلا .. أترككم معه

ماهي سورتك في المفضلة في القران؟

سورة يوسف بحبها جدا والسورة الوحيدة اللي حافظاها

بترتيل غير الترتيل اللي بقرأ بيه .. بترتيل الشيخ

الحصري ..وسورة غافر مش بقدر اسمعها غير ما أبكي

وسورة الجن

ماهى احب ايه اليك الايه التى دائما تتمناها؟

ربنا لا تزغ قلوبنا بعد اذ هديتنا وهب لنا من لدنك رحمة انك انت الوهاب

ربنا انك جامع الناس ليوم لا ريب فيه ان الله لا يخلف الميعاد

، ربنا انك من تدخل النار فقد اخزيته وما للظالمين من انصار

ربنا اننا سمعنا مناديا ينادي للايمان ان امنوا بربكم فامنا ،

ربنا فاغفر لنا ذنوبنا وكفر عنا سيئاتنا وتوفنا مع الابرار ،

ربنا واتنا ما وعدتنا على رسلك ولا تخزنا يوم القيامة انك لا تخلف الميعاد

ما هى اكثر آيه تخاف منها وتدعوا الله ألا تكون من اصحابها؟

قُلْ هَلْ نُنَبِّئُكُمْ بِالْأَخْسَرِينَ أَعْمَالًا الَّذِينَ ضَلَّ سَعْيُهُمْ فِي الْحَيَاةِ الدُّنْيَا

وَهُمْ يَحْسَبُونَ أَنَّهُمْ يُحْسِنُونَ صُنْعًا

أُولَئِكَ الَّذِينَ كَفَرُوا بِآيَاتِ رَبِّهِمْ وَلِقَائِهِ فَحَبِطَتْ أَعْمَالُهُمْ فَلَا نُقِيمُ لَهُمْ

يَوْمَ الْقِيَامَةِ وَزْنًا

ما هى الايه التى تشعر بانها تتحدث عنك؟

وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ

وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ

عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا

من احب صحابى واحب صحابيه اليك؟

الصحابي سيدنا خالد بن الوليد رضي الله عنه ..

والصحابية السيدة خديجة رضي الله عنهاوارضاها

من أحب نبي إليك بعد الحبيب صلى الله عليه وسلم؟

سيدنا يوسف.. وكل الأنبياء بجد بحبهم الأسئلة دي صعبة

عايزة اكتب ناس كتير!!

إذا كنت على عهد النبي صلى الله عليه وسلم فمن كنت تحب أن تكون ولماذا؟

السيدة فاطمة الزهراء طبعا .. سيدة نساء العالمين ..

وعلشان هيا كانت حبيبة رسول الله.. وبعدين دا انا

اسمي علىاسمها :)

ما هو منتداك وموقعك المفضل؟

مممم، انا بطلت اشارك في منتديات تماما

لكن المواقع اللي بتردد عليها اسلام اونلاين ..طريق الاسلام..

صيد الفوائد..الدرر السنية ..الملتقى .. موقع كل الطلبة

ما هى احب الاسماء التى تحب ان تنادى بها؟
نور

من هو كاتبك المفضل؟

السؤال دا هكتب فيه كتير بقى وماليش دعوة

طبعا طبعا طبعا .. مصطفى صادق الرافعي وبصرة مع صموود

وبعدين الاستاذ الكبير عبد الوهاب مطاوع الله يرحمه

والدكتور اكرم رضا في الاكتب الاسرية والتربوية

وفي الشعر .. احمد مطر في القمة .. وبعدين فاروق جويدة

وكل من له كلمة راقية ومعنى عميق اكيد بحب اقرأ له

مدون له عليك فضل او استفدت منه؟

الباشمهندس "عصفور المدينة" بجد فعلا ربنا يجزيه عني

خيرا .. مش بدخل المدونة عنده الا وبعرف حاجة جديدة

او بتعلم او بفهم اكتر او بيكون في تذكرة بحاجة معينة

ومها صاحبة فتات من كلام ربنا يكرمها من الناس اللي

شجعتني على التدوين من الاساس .. وعرفتني بمدونة

عصفور المدينة

وبجد مدونين كثر بتعلم منهم ..

مش عايزة اقول اسماء علشان ماانساش حد

بصوا في المفضلة كدا

:)

من هو قارىء القران المفضل اليك؟

الشيخ الحصري ..والعفاسي

من هو منشدك المفضل؟

أبو عبد الملك .. وابو خاطر لكن مش في كل اناشيده

ما هو نشيدك المفضل ؟

كثيييير منها... احبك ربي لأبي عبد الملك

ياطيبة ويا مكة ويا أقصى

مش هنفارق .. مصطفى محمود

أخي في فؤادي

اذا كان لك دعوه واحده تدعوها وستتحقق فبماذا ستدعوا؟؟

ان ربنا سبحانه وتعالى يجعل عز الاسلام على ايدينا

احنا .. الشباب بتاع الجيل دا ..نفسي اشوف نصر الاسلام

بيتحقق على ايدي

ويارب استعملني ولا تستبدلني

من هو الداعيه المفضل اليك او شيخك المفضل؟؟؟؟

الدكتور محمد بن عبد الرحمن العريفي

بجد بحب الشيخ دا في الله

ما هى اكثر عباده تشعر انها تجعلك قريب جدا من الله؟

قيام الليل .. وقراءة القرآآآآن

من احب افراد عائلتك اليك؟؟

اسرتي حبي لها لاينقطع

وعائلتي كذلك .. لكن لي خالة بحبها جدا

وبجد ربنا يجازيها خير ويرزقها الجنة

ما هو املك فى الحياه؟؟

زي ما قولت فوق .. بجد والله نفسي الشباب يفوق

ونفسي نصرة الاسلام تبقى على ايدينا

وعلى المستوى الشخصي

نفسي اجيب ثلاثة اولاد يكونوا زي خالد وابو بكر وعمر

بس .. ومعلش طولت عليكم

انها حقا.. لأيام مباركات

كل عام وانتم والأمة الاسلامية بخير وعزة

كنت اود ان اكون من اول المهنئين بهذه الأيام المباركات

!!!ولكنها تلك الامتحانات .. قاتلها الله

ها قد اقبلت ايام العشر من ذي الحجة..
وما اجمل شكل الحجاج وهم يتوافدون على مكة لآداء

فريضة الحج
يتوافدون من كل حدب وصوب..
من بلاد عربية وأعجمية .. وبرغم اختلاف
اللغات .. والأشكال .. والألوان
إلا انهم ككقلب رجل واحد ..لايرجون إلا الوقوف بين يدي
الكريم المتعال
وما اكثر حظهم وهم على جبل الرحمة في يوم عرفات
يدعون الله سبحانه وتعالى بالعتق من النيران والرحمة والغفران
فيستجاب لهم بإذن الله ..
ويرجع الحاج إلى بلده وقد غفر ذنبه .. وأصبح كيوم ولدته
أمه .. صفحته بيضاء نقية من الذنوب

هذه الأيام العشر كلها خير .. نهارها أفضل عند الله
عزوجل من نهار رمضان .. الصيام فيها سنة عن رسول الله
صلى الله عليه وسلم
وصيام يوم عرفة يكفر سنة قبلها وسنة بعدها
ياريت فعلا نستغل الايام دي .. لأنه ما اشد احتياج
الواحد مننا لحسنة واحدة .. فما بالكم بباب من الحسنات؟؟

وأسألكم الدعاء لي يوم عرفة بالتوفيق في مذاكرتي

علشان بجد نفسي ابر أبي وامي وافرح قلبهم

بتقدير كويس

:)

إنّـــه ... وإنـّــــها

<1>

إنه صوت المؤذن يؤذن لصلاة الفجر..

تردد خلف الآذان، ثم ترفع يدها للدعاء..
فتدعو لنفسها ومن تعرفهم بالهداية والصلاح، وأن

يفتح الله عليها من ابواب فضله
فهو يومٌ جديد وعلى عملنا شهيد.

ثم تدعو لإخوانها المسلمين في كل مكان
أن ينصرهم الله ويثبتهم على الحق ..

تلح في الدعاء ..
تتوضــأ ..لتصلي.......... الله أكبــر
!!يا ألله! ما هـــذا؟

!إنها تبكي فور تكبيرتها الأولى

إنها تشعر وكأنها في خلوة مع ربها..

وكأن المكان قد خلا من البشر رغم وجودهم..
فتبكي وتسيل دمــوعها..
!سبحان الله.. إنها تصلي بحق

<2>
!إنه يوم الثلاثاء.. هاهو بانتظار موعد..بل لقــاء

إنه يشعر بأن الأرض لا تحمله

من فرط السعادة
يطير قلبه فرحاً.. إنه يداعب والديه ويلقي

!..الدعابات المرحة هنا وهناك

إنه يحب هذا اليوم حقا! وكأنه يهب له

!زادا يواصل به أيام أسبوعه

إنه يوم الدرس في المسجد .. يوم لقاء أحبته

وإخوانه ..وشيخه ..
يغتسل ويتطيب ويلبس ما يحبه من الثياب ..

وينطلق نحو المسجد
حقا.. إنه شاب .. قلبه معلقٌ بالمساجد.

<3>

هاهي تسير في طريقها .. ملتزمة بحجابها الكامل

لا تلتف يمنة أو يسرة .. فهي تضع عيناها على
موضع سيرها .. يلهج لسانها بذكر الله سبحانه وتعالى ..
ولكن!! تتعثر في مشيها .. فيلقي احد

!الشباب –ضعاف النفوس- مزحة وكلمة

يحمر وجهها خجلا ، ولكنها لا تلتفت إليه وتمضي

في طريقها وكأن شيئا لم يكن..
حقاً .. إنه الحياء.

<4>

هاهو ما أبحث عنه! يمسك به بلهفة ..يفتحه

لتكتحل عيناه برؤية ما بداخله .. تهب نسمات رقيقة
فتتقلب الصفحات ..وتقع عيناه عليها..

إنها جميلة بحق.. لمست وجدانه ، فخفق قلبه واغرورقت
!!عيناه بالدموع

لقد كان يبحث عن مصحفه.. وهي آية من آيات الله

يقول فيها تبارك وتعالى " ألم يأنِ للذين آمنوا
أن تخشع قلوبهم لذكر الله وما نزل من الحق"
بلى يارب .. قد آن .. آن يـــارب!


<5>

هي في كليتها.. تلتزم بحضور محاضراتها..

تلخص ما تكتبه من كلام المُحاضر
ثم تطبعه لزميلاتها.. فهذا هو التعاون وهذه هي أخلاقها..
تبتسم في وجه من تقابل من الصديقات ..

فالبسمة هي عنوان الحب
وهي مفتاح قلوب الآخرين..
تدخل إلى المصلى .. يتحدثن ويتجاذبن أطراف الحديث ..

بقيت دقائق على موعدالمحاضرة القادمة ..

تبدأ الفتيات بالانصراف ..
!!تستعد لتنصرف معهنّ.. ولكن

!..بقيت دقائق ايضا على موعد صلاة الظهر

انتظرن يا غاليات إنه وقت الصلاة...
سنتأخر.. المُحاضر سوف يمنعنا من الدخول..
ولكنها تصر.. وليحدث ما يحدث ..
تصلي الفتيات في جماعة .. ثم تلحقن بالمحاضرة

ويسمح لهن بالدخول
حقاً .. إنه من ينصر الله ينصره.


<6>

إنه يشعر بالضيق.. يشعر بأنه قد تغير في معاملاته ..

اصبح فاترا
!أخذ يفكر .. ويفكر .. نعم هذا هو الحل

سوف أذهب إليه .. سوف اشكو له فهو من يسمعني

ويفهمني أكثر من أي أحد
أخذ يشكو له .. إلى أن بكى ..وعلا صوته بالبكاء
ثم اخذ يدعوه .. ويرجوه ..
فهو ربه .. ومليكه ..وحبيبه..
وأحسن الظن بربه .. وعلم أنه واقف بين يدي

ملك كريم لا تشتبه عليه اللغات ولا تختلط لديه
الأصوات ولا يتبرم بكثرة السائلين..

!!..وتنوع السؤالات

فهذا هو دأب الصالحين..
إن أهل الجنة إذا جن الليل.. وفتح ربهم أبواب مغفرته..

كانوا أول الداخلين
فهم المؤمنون بآيات ربهم حقاً

معذرة على الاطالة ولكنها خواطر كتبتها منذ فترة

تذكرتها عندما قرأت تدوينة وقولوا للناس حسنا

عند أخي الفاضل عصفور المدينة

نص التاج الباقي :)

لومكنتش مصري بس عربي
كانت هتبقى إيه نظرتك للمصريين واللي بيحصل في مصر دلوقتي؟

اكيد كنت هكون مشفقة ومتحسرة على حال مصر

والمصريين ، اللي بدل ما تبقى مصر أم الدنيا بجد وقلب الوطن

!!العربي كله .. بقت مسخرة الوطن العربي

لوكنت أوروبي أو غير مسلم
بردو إيه نظرتك للعرب والمسلمين؟

بصراحة ما اتخيلش التخيل دا بالمرة

لكن نظرتي هتكون نظرة تقدير واحترام للمسلمين

اللي بجد مسلمين صح .. ونظرة استنكار وعدم فهم

للمسلمين اللي لا هما كدا ولا هما كدا

!بالاسم بس

لوقالولك إنت بقيت رئيس جمهورية هتعمل إيه؟

!هستقيل

لوخطبت واحدة أو اتخطبتي لواحد
وأثناء الخطبة اكتشفت أو اكتشفتي إن الطرف الآخرغير قادر على الإنجاب
هيكون تصرفك إيه؟

:)

أدام اتخطبت وخلاص .. يبقى اكيد انا استخرت

ربنا كتير ، وحاسة بارتياح وكل حاجة .. وبعدين

أهم حاجة الدين والاخلاق والمعاملة .. ودي حاجة

من عند ربنا وكانت ممكن تكون فيا كمان

لوطلعت القمرهتكتب إيه عليه؟

هتكتب عليه " ربنا ما خلقت هذا باطلا

سبحانك فقنا عذاب النار"

لوكنا في عصر ازدهار الأندلس
كنت تتخيل نفسك إزاي؟

ياااااااااااااااه

الاجابة دي عايزة كتب والله بجد

دايما بتخيل لو كنا دلوقتي زي كنا في عصر الاندلس

كان بقى حالنا ازاي

ناوية إن شاء الله أكتب موضوع بالتفصيل فانتظروه

لوأنا مررت التاج ده لحد وما جاوبش عليهأعمل فيه إيه؟

بصراحة انا بطلت امرر تاجات لكن دايما بقول

اللي يحب يجاوب عليه يتفضله بجد

لو .. وهيحلى الجو

السلام عليكم .. الحمد لله امتحنت النهاردة الصيدلانيات

والامتحان كان معقول إلى حدٍ ما .. اللي بيحضر محاضرات

هيحل .. على رأي الدكاترة

بس يعني كل دكتور ومزاجه تنوع الامتحان من صعب

لصعب او أصعب ...هههه

الحمد لله على كل حال هما اربع اجزاء والجزء اللي

عرفت الدرجة بتاعة كانت 7 من 7 ونص فالحمد لله

الحبيبة الصامدة .. زادها الله اباءا وصمودا على الحق

أرسلت لي باقة من الأسئلة التي دارت بخاطرها على صورة

تاج .. وطبعا يشرفني اجاوب عليه لأنه فعلا فيه اسئلة اكتر

من رائعة كان نفسي حد يسألها لي من زمان

انا هجاوب على 3 اسئلة من التاج الآن وإن شاء الله

البقية تأتي ..حين ميسرة

لوكان ينفع ترجع طفل تاني وتخليك طفل علطول هترجع؟ وليه؟..

لو كان ينفع ارجع طفلة تاني هرجع على طوووول

ومن غير تفاهم اصلا.. علشان الطفولة دي احلى مرحلة

في الحياة بجد .. لاهم وحزن ولا ضيق

ولاتحمل مسؤولية .. كفاية البراءة اللي الواحد بيكون فيها

لكن دي سنة الحياة إن الواحد يكبر ويشوف الدنيا

ويعمل فيها .. واهم حاجة انه يحافظ على نفسه منها

وياخد باله احسن الدنيا تاخده .. ويعمل لآخرته

ويارب يطلعنا من الدنيا على خير

لوإنت طبيب وعندك مريض ميؤوس من حالته أيهما تفضل

إنك تصارحه بالوضع وتقوله كل شيء بأمر الله

في الاخر ولا تغرس فيه الامل لغاية لما يموت؟..

انا ممكن أصارحه ، لكن مش بشكل مباشر .. بصراحة

مهنة الدكتور دي المفروض انها مهنة عظيمة جدا

لكن مافيش دكتور حاسس بقيمتها دلوقتي وأغلب

الدكاترة بيعاملوا المرضى على انهم مش بني آدمين

وبيحسوا .. حاجة آخر مهانة

وفي دكاترة ياما اسمع حكايات انهم قالوا للمريض

هتموت وعاش الحمد لله

فكلها اقدار بين يدي الله .. ولا حياة بدون أمل

وإنه لا ييأس من روح الله إلا القوم الكافرين

قل للطبيب يموت لا من علةٍ..

من ياطبيب بطبه أرداكا ..

قل للصحيح نجا وعوفي بعدما ..

عجزت فنون الطب من عافاكا..

لوسمح لك برؤية الرسول عليه الصلاة والسلام

وإنك تقوله كلمة واحدة بس أو جملة واحدة بس هتكون إيه؟

ياااااااااه منا حياتي وأمل عمري

رحت المدينة مرتين ، وزرت قبر النبي والروضة

الشريفة وبجد ما اقدرش اوصف احساسي

نفسي اقوله : فداك نفسي يا رسول الله

بأبي وامي أنت يا رسول الله

ونفسي ما يعرفش الحال اللي احنا

عليه دلوقتي علشان ما نبقاش خذلناه

وحاجات كتير كتير كتييييير

يتبع بإذن الله

..ثورة

نظرا لأجواء الامتحانات المسيطرة على الطقس حاليا

أضع لكم قصيدة التمرد هذه .. كنت قد كتبتها بعد

امتحان مادة العقاقير والنباتات الطبية - الفرقة الثانية

...أشهد أني

أعلن ثورة عصياني

على تلك الأسئلة النباتية

..تزرع في قلبي يأسا

...ألما

!!تجعلني أعصر ذاكرتي الورقية

**********

سؤالٌ صعبٌ

..في البذرة

..وآخر في الثمرة

أحاول أن أتذكر

ترتسم ظلالا في عقلي

..وتمحى المعلومات

!!بممحاة أبدية

**********

أحاول عبثاً

..أن ارسم جذرا

وأصف خلايا القشرة

تليها البشرة

..وأضع حبات النشا

!!والكالسيوم الكرستالية

********

أُسرعُ خُطى قلمى

لم يتبق من الوقت سوى دقيقة

..تذكرت حل سؤال في الصميم

saponin كان عن فائدة الـ

...وهنا تبسمت

!!بمأساوية

*******

انتهى الوقت

وعلا صوت المعيد

..مُطالبا بالورقة

وسمعت الجملة الإعتيادية

!ضع القلم

!!فقد انتهت التمثيلية

شكر واجب

السلام عليكم ورحمة الله وبركاته

الحقيقة انا عايزة ابعت شكر خاص للأخ الفاضل ياسر مدني

ومدونته الجميلة دينامو الاخوان ...

فاكرين مسابقات رمضان (الفوازير) اللي أخونا كان عاملها

وبذل فيها مجهود كبير ربنا يكرمه .. انا اشتركت في المسابقة

وطلعت الأولى الحمد لله والأخ ياسر كان وعد بهدية للفائزين

والهدية وصلت النهاردة .. لسة مستلماها من ربع ساعة تقريبا

فجزاك الله خيرا على تعبك ومجهودك وعلى الهدية اللي أكثر من

رائعة بجد .. وبصراحة دا كتير جدا عليا .. ويكفيني أن انا شاركت

في مسابقة زي كدا وكسبت مدونات صديقة وأخوة في الله لهم كل

الود والاحترام

الهدية كانت عبارة عن .. مصحف .. وكتاب زوجات الرسول

ومجلد فقه السنة بأجزائه الثلاثة ...

جزى الله خيرا من أوصل الهدية ، وجزاك الله خيرا يا أستاذ

ياسر .. وشكر مني للشاعر وليد الرفشي

وبارك الله فيكم

تاج مختلف جدا ..متميز جدا

!!لم أجد صورة مناسبة لما أشعر به ..غير هذه الصورة ..فعفواً

طوال أيام هذا الأسبوع والافكار تتقافز بداخل رأسي وتلح بأن

!تطل برأسها عليكم من خلال مدونتي الغلبانة.. ولكن حكم القوي

المذاكرة وسنينها ..دا انا بجد زهقت وحالتي زي ما انتوا شايفين

في الصورة كدا .. المواد السنة دي شيء لا يطاق والكميات مهولة

والامتحانات في اول 11 بتاعة الميد تيرم ... والضغط والخنقة

بجد محتاجة دعواتكم بظهر الغيب كثييييرا
!والله المستعان

*********************

وصلني تاج .. أو وسم - على قول مها- من العزيزة المتألقة منة الله

صاحبة الملونة الجميلة طيف .... التاج من العيار الثقيل بجد ...فهجاوب

عليه على قد ما ربنا ييسر الأمور..وربنا يبارك فيك
منة الله على افكارك الجميلة المبدعة

<1>

في حوار بين اثنين من المفكرين العرب .. نقد احدهما

الاخر قائلا .. " انه يحاورني بعقلية خطيب جمعة "جملة

تحمل في طياتها نقدا .. او قُل تقليلا من فكر هؤلاء الخطباء ..

فما رايك فيما يقدمه الخطباء لنا من فكر -

ان جاز تسميته كذلك؟؟

كثيرا ما أحاول أن اسمع خطبة الجمعة من المنزل ، لأن المسجد تحت

منزلنا مباشرة .. ولا اكتمكم سرا في كثير من الاحيان أصاب بالاحباط

ولكن في احيان أخرى اشعر ببعض التفاؤل ..

لم الاحباط ولم التفاؤل؟ هذا ما سأحاول ايضاحه ..

خطيب الجمعة ..كثيرا ما أشعر أنه لا يستشعر ما يقول أو أنه حافظ

كلمتين لازم يقولهم وخلاص ...لأن هذه هي وظيفته! وربنا يسامحني

على احساسي .. لكن للاسف دا اللي بيوصل لي وبيوصل للمصلين

ما فيش تواصل .. ما فيش احساس بالقضايا الحالية ومحاولة

الكلام فيها ... ودا اللي بيشعرني بالاحباط

أما في اوقات تانية بحس بالتفاؤل لما بسمع خطيب الجمعة بيتكلم في

موضوع احنا محتاجينه أو حاجة بتمس حياتنا وبيحاول فعلا

انه يترك بصمة في عقل المستمع

زي خطبة الجمعة اللي فاتت كانت بتتكلم على المدوامة على الطاعات

بعد رمضان .. والتقوى .. وبجد الكلام كان طيب جدا

ومايخليش المستمع يمل .. وهي دي اهم نقطة في خطبة الجمعة

الملخلص في الرد على تساؤلك .. ربما النقد كان بسبب الجمود نوعا

ما في الفكر اللي بيقدمه خطيب الجمعة وتكرار الكلام بنفس الاسلوب

والجمود ايضا في التفاعل مع المستمع

اتمنى اكون رديت رد فيه بعض الايضاح أو الافادة

********

<2>

قال الشافعي " رأيي صواب يحتمل الخطأ

ورأي غيري خطأ يحتمل الصواب"

فهل تنطبق هذه القاعدة على الدين ..

هل ترى ان الدين الذي تؤمن به هو الدين الحق

و ربما يكون الاخرون على حق ايضا فيما يؤمنون به

من اديان .. ام ان دينك الحق و سواه باطل ؟

يقول الله سبحانه وتعالى في كتابه الكريم " اليوم أكملت لكم

دينكم واتممت عليكم نعمتي ورضيت لكم الاسلام دينا" وهذا ما أؤمن

به حقا .. الدين الذي اؤمن به هو الحق وهذا ما ذكره الله عزوجل

في كتابه الكريم .. وذكر في مواضع اخرى انه من يبتغي غير الاسلام

دينا فلن يقبل منه ..

ولكن ربما ربما يكون الآخر على بعض الحق في بعض ما يؤمن به

فليست اليهودية أو النصرانية كلها محرفة .. ولكن لا فائدة

مما يؤمنون به يوم يأتي يوم الحساب

ويبقى للجميع حرية الاعتقاد فيما يريدون ..ولكن لمن المفاز؟

***************

<3>

الكثيرون اليوم .. سواء من العرب او الغرب.. يتجهون الى نقد

التدين .. يصفقون الى الاعمال الادبية التي تتصادم

مع الدين و يصفونها بالابداعية .. خصوصا .. مع تزايد

اعمال العنف في شتى بقاع لارض و التي ترتكب باسم الدين ..

و في المقابل يهاجم علماء الدين هذه الافكار..

بدعوى ان الاديان ما وجدت لخنق الحريات ..

بل يتجاوزون ذلك للقول بان الدين هو مصدر الحرية ..

لكنها تبقى كلمات .. هل التقيت بنفسك بشخص متدين

و حر في افكاره ..

هل حاولت ان تكون ذلك الشخص ..

لكي تبطل تلك النظرية؟؟

للاسف تزايدت الاعمال الابداعية التي تنتقص من الدين

وتصف المتدين بالجمود والتخلف الفكري والاجتماعي والثقافي

ولكن ما وجدت دينا اعطى لمنتسيبه هذا القدر الكبير من الحرية كما

!!اعطانا الاسلام

وكثيرا ما التقيت بهؤلاء المتدينين ذوي الفكر الحر المبدع

ولكن للحرية قيود ..بحيث انها لا تتعارض مع التدين طبعا

وهناك من يفهم الحرية بفهوم خاطيء تماما

...فيسيء بذلك للاسلام

وان شاء الله لي عودة وتوضيح لهذا التساؤل نظرا لضيق

الوقت أمامي الآن ..

النقاش مفتوح .. والبوست سوف يتم تحديثه ان شاء الله..

بارك الله لكما وبارك عليكما وجمع بينكما في خير

السلام عليكم .. دا اولا .. وثانيا ..الكتابة في المدونة وحشتني جدا جدا بجد

لكن اعمل ايه في الوقت دا .. بجد والله مافيش وقت لأي حاجة واليوم بيعدي

سريعا وحتى المذاكرة اللي المفروض بنقلل من الدخول للانترنت عشانها ..

مابتتذاكرش!! ...... لكن ربنا ييسر ودعواتكم بأن ربنا يبارك في الوقت

ثالثا.. الحمد لله العودة بالسلامة لإستايل المدونة القديم ، لأني عيني

مش قادرة تتأقلم مع الاستايل الجديد اللي كان ،

وانا قولت يالا تفاريح العيد وخلاص ..

رابعا.. بقى ودا صلب الموضوع .. طبعا الجواب باين من عنوانه ..

كان العيد وعلشان احنا دايما بنحب لما نفرح ..نفرح بذمة ..

!!فالعيد كان عيدين ...ثلاثة ..أربعة مش عيد واحد ..

ماشاء الله لاقوة الا بالله على الأفراح وعقد القران والخطوبات

السعيدة كلها ان شاء الله

ومن موقعي هذا أحب أهنيء حبيباتي

اللي اتعقد قرانهم

آلاء واشراق واميمة ومروة

ويارب كتر أفراحنا ..

الموضوع اللي كنت عايزة اتكلم فيه ، ان انا شايفة رغم العربيات

اللي مابطلتش تزمر من اول يوم العيد والأغاني اللي طول الليل

شغالة في الشارع والافراح دي كلها ..

!!الا إن نسبة اقبال الشباب على الزواج مش كبيرة

او بمعنى آخر نسبة الشباب اللي عندهم امكانيات تؤهلهم إنهم

يقبلوا على الزواج مش كبيرة !! ...

ومن هنا بجد بوجه كلمة للاباء والأمهات ..

يسروا ولا تعسروا

انا يمكن كلامي يكون بسيط وسريع وموجز ، لكن نفسي الناس تقرأ

الكلمتين دول كلنا عارفين الحال دلوقتي ازاي ..

وقد ايه الشاب من دول بيتعب لما يلاقي شغل

ويبدأ يكون نفسه .. وتلاقي أبو العروسة وامها اشتغلوا عليه

طلبات للصبح ..

الأصل في السنة .. اذا جاءكم من ترضون دينه وامانته فزوجوه

ووالله والله الدين هوا اساس كل شيء وان لو العروس واهلها

احسنوا الاختيار من البداية على هذا الاساس ..

هتكون احلى حياة في طاعة الله

وايضا الكلام للشاب .. فاظفر بذات الدين تربت يداك .. وربنا يكرم الجميع

ويزوج بنات وشباب المسلمين جميعا .. اللهم آمين

كلمة أخيرة واقفة في زوري ..

دلوقتي انا بكتب الكلمتين دول وفي ((حنة)) في

الشارع واغاني طبعا وحاجة آخر قرف ..

بجد تلوث سمعي وضوضاء .. ربنا يهدي ..

نفسي بجد يكون في احترام لمشاعر الناس ..

!!وانت حر مالم تضر

وبارك الله فيكم على حسن القراءة ،،،

كل عام وانتم بخير ..وعساكم من عواده

الله أكبر الله أكبر الله أكبر..لا اله الا الله

الله أكبر .. الله أكبر ولله الحمد..

الله أكبر كبيرا ..والحمد لله كثيرا ..وسبحان الله بكرة وأصيلا..

عيدكم مبارك وكل عام وانتم طيبين ومن الله قريبين

عيدكم مبارك بكل الألوان .. لكم مني هذه الكروت البسيطة

اللي يعجبه كارت يتفضله .. ولكم مني ارق الامنيات

بقضاء اجمل الأوقات في طاعة الله

:)

!!سحر ..دجل .شعوذة .. احنا في الخدمة

لعل البعض منكم لاحظ غيابي الفترة السابقة ولعل البعض الاخر
لم يلاحظ هذا الغياب .. ولكنني أعود لكم بعد غياب ..
ومعى قصص اغرب من الخيال .. اشياءلم يكن بامكاني تخيل حدوثها ..

مجرد تخيل ... ولكنها حدثت امامي .. ولأقرب الناس لي ..

!فأهلا بكم .. وحكايات اغرب من الخيال .. ولكنها واقعية

بداية القصة: تتصل احد الصديقات ..

!ألم تعرفي بأن صديقتنا (فلانة) قد وصلت من السفر منذ خمسة ايام؟

أنا: خمسة ايام! كيف لم تتصل بي الى الان ؟

!الصديقة: لا ادري ولكن اشعر بأنها غريبة ومتغيرة كثيرا عن عادتها

اغلقت الخط لأتصل بصديقتي ، ردت والدتها ..

!واعتذرت لي بأن الصديقة لا تستطيع مكالمة احد الان

تكررت اتصالاتي بالأم وفي كل مرة

تعتذر لي بأن صديقتي لا يمكنها التحدث الان..

وبعد ثلاثة ايام .. تصارحني الام بالحقيقة المرة ..

!صديقتي مريضة .. نفسيا

!ما الذي حدث؟

عندما سافرت اليهم في الدولة العربية التي هم فيها ،

لتلقاهم بعد غياب طويل دام لمدة سنتين ...

وجدت والدها مصابا بحادث تصادم بشع ..

مما ادى الىاصابته اصابات كثيرة ..

ولأنها مرتبطة كثيرا بوالدها دخلت في صدمة عصبية ونفسية

!!وفقدت القدرة على الكلام

وهل هذا ما جعلها في هذه الحالة التي هي عليها

!!لمدة شهرين كاملين (هي مدة الاجازة) ؟

الصدمة الكبرى وهي لب هذا الموضوع...

ترد الأم بكل اسف .. لا يا بنتي اصلها معمول لها سحر!

!سحر يعني ايه يا خالة؟

دي (فلانة) ماشاء الله عليها مش بتسيب قيام الليل ولا الاذكار ..

احسبها على خير ولا ازكيها على الله..

الأم بصوت مختنق يملؤه البكاء: والله يا حبيبتي زي ما بقولك ..

عمها عملها سحر لأنه على خصام مع ابوها ..

!!!وقاله اني مش هسيب بنتك الا لو اتجننت او موتت نفسها

!!!انا: عمها؟

الأم : دي اول ما شافت باباها بحالته دي ، زي ما تكون اتجننت فعلا

ودخلت غرفتها وقفلت على نفسها ولبست اسود وعلقت هدوم سودا

ومسكت السكينة وقالت اللي هيقرب مني هموت نفسي!!

انا بجد والله العظيم ما كنت مصدقة اللي بيتحكي دا ..

وقولت لأمها وحضرتك عملتوا ايه ؟

قالتلي خلينا شيخ قرأ عليها قرآن وقال ان السحر اتفك ..

وهيا دلوقتي بتتعالج من آثار الحالة النفسية بس..

لا اكتمكم سرا انا حاسة انه لا اتفك ولا حاجة

لأن صديقتي حالتها صعبة جدا جدا جدا

فوق ما تتخيلوا .. ربنا يشفيها ويعافيها ..

**********************************

طيب انا بحكي كل دا ليه ؟؟؟

بجد القصص اللي قبل كدا اللي كنت بسمعهاعن السحر الأسود

والدجل والشعوذة ما كنتش بصدق اغلبها ، وكنت بقول

ان ادام الواحد متحصن بالاذكار وبكتاب ربنا والصلاة

وكدا يبقى مافيش اي حاجة ممكن تقرب منه ..

لكن سبحان الله جت عليّ لحظات اتهزت الكلمات دي قدامي

لما شوفت صاحبتي اللي بعتبرها احسن مني بمراحل

وهيا في ازمتها دي ..ولما شوفت ناس كتير كويسة في الازمات دي ..

لكن اللي عايزة اخرج بيه من الموضوع دا ان بجد

طول ما الواحد مؤمن بالله و مؤمن بأنه أخذ بالاسباب

وانه تحصن بالاذكار ، يبقى ربنا سبحانه وتعالى هيحميه وهيحفظه ..

وإن كان ربنا قدر على الاخت دي وقوع السحر فهوابتلاء من عنده ،

مش علشان مثلا ايمانها ضعيف او غيره ...

حاجة تاني من الدروس المستفادة وهي ان الاخت دي

ما دخلش لها السحروتمكن منها الا في حالة ضعفها

لما رأت والدها وهو مصاب .. ربما والله اعلم يكون تملكتها لحظات

من ضعف الايمان او عدم الرضا بقضاء الله ..

مع ان السحرعرفوا انه معمول لها من فترة طويلة ..

علشان كدا لازم نعود انفسنا على اننا نؤمن بقضاء الله

مهما كان ، وانما الصبرالحق بيكون عند سماعي للمصيبة ...

!مش ازعل شوية وبعدين اقول يارب رضيت

نقطة بقى مهمة جدا عايزة الفت النظر لها..

وهي اني بقيت اسمع عن موضوع السحر دا كتير ..

!!واحدة سحرت لزوجها!! وآدي عم سحر لبنت اخوه

!!وام بتسحر لزوجة ولدها
يعني سبحان الله الحاجات دي بقت منتشرة كدا؟

فين الايمان بربنا سبحانه وتعالى ؟

وفين الناس من الاحاديث اللي بتحرم السحر والكهانة ؟ ؟

وكمان الحاجات دي بتيجي من اقرب الاقربين؟؟؟؟؟؟؟؟

إلى اي درجة ايمانية وصلت الناس؟؟

هل الجهل والتخلف وصل بينا لكدا؟؟؟

وهل اللي بيعمل كدا دا نسى ان هناك ربنا سبحانه

وتعالى قادر عليه ؟؟

دي بجد كلها تساؤلات انا عايزة اثيرها للمناقشة...

أنا آسفة اني طولت عليكم اوي ..

بس فعلا عايزة أسمع رأيكم في الموضوع دا.